Jeoturismu hanesan konseitu foun ida iha turismu ne'ebé eziste iha era modernu ne'e, termu jeoturismu komesa eziste iha tinan ± 1990 hanesan ne'e, ema ne'ebé hasai termu jeoturismu ne'e mak naran TOM HOSE no sai nu'udar Aman bá Jeoturismu. Nia hanesan Jeolojista ida husi Buckinghamshire Chilterns University iha Inglateta. Nia primera ves hakerek artikel ida iha Geological Society iha tinan 1996 ho tema "Geotourism, or can tourists become casual rock hounds: Geology on your doorstep”. Nia konseitu ne'e agora sai famozu liu iha mundu no sai hanesan alternativu ida hodi dezenvolve turismu ho maneira konservasaun, edukativu, no sustentavel.
SAIDA MAK JEOTURISMU ?
Jeoturismu (Geotourism) mai husi liafuan "geo" signifika terra (bumi) no "tourism" signifika turismu (wisata). Jeoturismu hanesan tipu turismu sustentavel ida ho karaterístika konservasaun ne'ebé relasiona ho tipu rekursus natureza (beleza natureza, fatuk/fosil, estrutura jeolojia, no jeolojia historia (geohistory) ho maneira ida hodi hasa'e ideias no kuñesimentu bá prosesu fenomena ne'ebé akontense ho naturalmente.
Ezistensia fenomena jeolojia ne'ebé eziste iha rai leten, iha kada area jeoturismu sei la hanesan ho area sira seluk no kada area nia iha karakteristiku jeolojia rasik. Panorama jeomorfolojia ne'ebé furak no uniku ne'e forma husi falha (tatohar) ou plaka subduksaun ne'ebé hamosu foho piramida (pegununggan kerucut), fatuk kuak, bee mota iha rai okos (bee iha fatuk kuak laran), lagoa no laguna, bee matan, tasi-ibun koral, telaga, panorama ho lanscape foho no ho nia iklima ne'ebé fresku, Volkaun ativu nomós la ativu, mud vulkanu, bee manas, gas matan no mina matan,
OINSA ATU DEZENVOLVE JEOTURISMU ?
Iha pontu lima mak importante hodi dezenvolve jeoturismu mak hanesan :
1. Geologically Based (Bazeia bá jeolojia).
Area jeoturistika hanesan forma husi prosesu jeolojia. Elementu ne'ebé sai hanesan atrasaun jeoturistika mak tipu fatuk, komposisaun mineral, kondisaun rai (soil), bee (rai leten no rai okos), no seluk-seluk tan ne'ebé iha relasaun ho jeolojia.
2. Suistainable (sustentavel).
Objetu jeoturismu ne'ebé uniku no furak tenki konserva ho maneira sustentavel (ho objetivu bá ita nia jerasaun tuir mai). La estraga estrutura ou karaterístika orijen ne'ebé iha ona antes maibe hare liu bá nia prezervasaun. Mineral barak mak folin tebes ne'ebé identifika iha objetu jeoturistika tanba ne'e hamosu oknum balun ne'ebé mak laiha responsabilidade atu eksploita no estraga iha objetu jeoturistika refere. Alende sustentabilidade, ne'e mós sei implementa prinsipiu ekoturismu hodi promove konservasaun no habelar kultural nomós nia historia.
3. Geologically Informative (Informasaun Jeolojia).
Iha mos informasaun relasiona ho historia jeolojia ne'ebé mak forma objetu jeoturistika refere ezemplu hanesan papan informasaun no mapa lokalidade objetu jeoturistika atu nune'e hafasil vizitante sira hodi hatene prosesu natureza ne'ebé akontese. Se karik iha informasaun refere ne'e iha, vizitante sira iha konsensia no interese atu bele mantein nafatin ambiente nia furak iha objetu jeoturistika refere.
4. Locally Beneficial (Benefisiu Lokalmente).
Iha objetu jeoturistika ne'e espera bele fó kontribuisaun no benefisiu bá komunidade lokál iha area refere, bele mós iha parte ekonomia, sosial, no seluk-seluk tan hodi bele ajuda no hasa'e liu tan prosesu dezenvolvimentu iha area refere. Objetu Jeoturistika ajuda mós sai hanesan media ida hodi promove turismu iha area ida.
5. Tourist Satisfaction (Satisfasaun Turista)
Iha objetu jeoturistika ne'e alende hasa'e kuñesimentu espera mós bele fó satisfasaun bá vizitante sira. Jestaun bá instalasaun infrastrutura ho di'ak, mo'os, seguru, nomós fasil atu asesu bá destinasaun jeoturistika refere atu nune'e vizintante sira sente satisfeitu.
---
No comments:
Post a Comment