Jeoturismu la'os de'it kona-ba jeolojia de'it maibe sei aprejenta ninia
patrimoniu jeolojiku ho valor signifikante hodi bele explora, dezenvolve no
selebra ne'ebe mak iha ligasaun tomak entre eransa jeolojiku ho aspetu seluk
iha area naturais, kultura no patrimoniu intangivel.
Eransa kultura ne'ebe iha hanesan dalan seluk ida hodi dada atensaun
turista nian la'os atrai deit liuhosi beleza no rikeza natureza nian maibe
turista sira mos bele estuda kona-ba kultura, tradisional no mos uzus kostume
komunidade ida nian.
Uma-lulik "LEZIAVALE" hanesan valor prinsipal kultura no istoria
Munisipiu Lautem nian. Maske komunidade Lautem uluk liu moris hanesan grupu
etniku bazeia ba tribus prinsipais, dalen no klan (ratu ou uma lisan) neebe
Munisipiu Lautem iha, maibe eransa kultura hanesan uma-lulik
"leziavale" sai ona identidade, simbolu no orijen Munisipiu Lautem
nian tamba patrimoniu kultura nee nudar kultura orijinal no sai sentru ba
sosiu-kultura no istoria.
UMA-LULIK "LEZIAVALE"
Bazeia ba etimolojia, uma-lulik Munisipiu Lautem nian hanaran
"leziavale" mai husi dalen fataluku husi liafuan
"Lee-Zia-Vale", "Lee" katak uma, "Zia" katak ain
no "Vale" katak iha. Signifika katak uma-lulik ne'ebe iha ain ho
ninia estrutura uma ain haat (4) ne'ebe hambrik aas.
Tuir lia nain lokal Suku Fuiloro (Sr. Dinis Faria) haktuir katak uma-lulik
"Leziavale" iha oin haat (4) ho ninia motivu no simbolu neebe
diferente. Motivu no simbolu hatudu orijen no kultura kada uma-lulik nian.
Uma-lulik "horurahu ara/horufatu ara" ho ninia eskultura
"lafaek" neebe inspira husi ritual nebe beiala sira paratika no
orijen husi beiala sira nian ho balada lafaek neebe iha valor espiritual.
Uma-lulik nee husi uma lisan "Naza Ratu" nian.
Uma-lulik "moruloi ara/panaratu ara" ho modelu "sei mecen
ara" ho eskultura "makikit ou manu pombu" neebe simbolu damen no
prosperidade. Motivu nee hatudu orijen no interaksaun beiala nian ho natureza
tempu uluk liu ba. Uma-lulik nee husi uma lisan "Latuloho Ratu" nian.
Uma-lulik "koro lee ara/chayloru ara" ho modelu "lee
poukala/uluwahana" no mos ho ninia eskultura "umana" ho
arkitetonika uma "leziavale" neebe kabuar. Uma-lulik nee husi uma
lisan "Chayloru Ratu" nian.
No ikus liu mak uma-lulik "loi sau ara/ina taman ara" husi uma
lisan "Wacumura Ratu" nian, maibe too agora seidauk hetan uma-lulik
ho modelu hanesan nee iha Munisipiu Lautem.
Alem de nee, uma-lulik "leziavale" nudar sentru ba sosiu-kultura
nian hodi halibur hamutuk uma lisam tomak atu partisipa festival kultura ou
eventu tradisional nian hanesan futu-manu, dansa tradisional (tebe dai, bidu no
haksoke) no mos atividade kultura seluk iha kada inagurasaun uma-lulik
"leziavale" nian. Eransa kultura nee hanesan rekursu ida neebe iha
valor aas nudar parte ida husi jeoturismu wainhira dezenvolve sai jeo-parke.
Sabadu, 23/03/2019.
Autor Membru USJTL : Sr. Mafaldo Jose Faria
No comments:
Post a Comment